У гэтым артыкуле разгледжана некалькі фактаў з біяграфіі ксяндза Казіміра Сайкоўскага, які быў пробашчам ашмянскага касцёла больш за 30 гадоў (1870-1901).
![](https://blogger.googleusercontent.com/img/b/R29vZ2xl/AVvXsEhPW_8c8vuky5AyVEy0vd6tLogoLVh8ANYXEEBQwWUeJNfp6obyqX5lZzGYz8a2C507wnaSTcDtF1R7BCRrLZpq0aAmlw4KxQRlbNBELFNQA883biZIY3nWfpcPFQHo_5YMMl2PgGCXXgmzpKIGcBLPjU2eGIQZ3EFz1Y7L1wTD1lpuLphKRcJGESk/w640-h156/14.jpg) |
Подпіс кс. Сайкоўскага |
На ашмянскіх каталіцкіх могілках ёсць магіла Сайкоўскага. Помнік захаваўся ў добрым стане, але, на жаль, страчаны медальён з выявай ксяндза.
Інфармацыя з помніка: кс. Казімір Сайкоўскі (ашмянскі дэкан) памёр 21 лістапада 1901, меў 64 гады. Значыць нарадзіўся ён каля 1837 г.
Побач з ім пахавана Марыя Сайкоўскага, якая памерла 21 верасня 1897 г., мела 86 гадоў (нарадзілася каля 1811 года). Гэта, як зразумела з яе ўзросту, напэўна, маці Казіміра.
Як звалі бацьку Казіміра, можна даведацца з "Памятнай кніжкі Віленскай губерніі за 1899 год". Ва ўсіх астатніх кніжках імя па бацьку ў ксяндзоў звычайна не пазнчалася, і толькі ў гэтай адмечана, што Казімір быў Георгіевіч. Значыць бацьку яго звалі Георгій (Юрый/Ежы).
![](https://blogger.googleusercontent.com/img/b/R29vZ2xl/AVvXsEhiHYzvLybJBuBHx4jiiTXblYpeaFoNfuoDPjHO0Co__rsXCGLyQZz0vnCb8EnOuD_VHypTCnkTpADOGbh7ijUBN-pTLetpcVyRj-Uloi6LethwEA1tXwdEG76kqLMWeMdY6OVendvvn5DICJAo7DKS_6yEtIimH2otf0mIVnYS888cmnpKkR9KA30/w400-h193/1899.JPG) |
Урывак з Памятнай кніжкі за 1899 |
На сайце geneteka.genealodzy.pl індэксаваны запіс аб нараджэнні нейкага Казіміра Сайкоўскага, які якраз нарадзіўся ў 1837 г. і меў бацькоў Ежы і Марыю (Марыяну). Усё як у вышейзгаданых звестках, таму з вялікай верагоднасцю гэты запіс можна аднесці да ашмянскага дэкана. Нарадзіўся ён 1 мая 1837 г. у Вільні, меў двайное імя - Казімір-Каетан. Бацькі - дваране Сайкоўскія Ежы і Марыяна (Шостак). Ахрышчаны ў касцёле Св. Яна 9 чэрвеня 1837 г.. Хросныя бацькі: Мікалай Маліноўскі (пракуратар мапы? Радзівілаўскай) і Марыя Гуттава (з Рэферув); асістэнты: Эмануэль Глюксберг (сакратар пракуратарскі) і Ганна Маліноўская (з Гуттаў).
![](https://blogger.googleusercontent.com/img/b/R29vZ2xl/AVvXsEj4wbGbs6nNe7oVxJmeHnJPlOwJJO4SiA0ji3T-Fq7RdZwuG5TDiPmor3cYetuf0kXR4K2Bi-CmONU-oUBT-mRgCtLEY0aLRXaG-bfqt3u95FJiZizHhUEQdETWvEIECKfo9cR3AOwQJMwoep0Iyfgb63kcdbP93UJsVRwuFfUCaa8Qd9FPepRxy_Y/s320/195%20-%20%D0%BA%D0%BE%D0%BF%D0%B8%D1%8F.jpg)
Хросны бацька Казіміра Сайкоўскага - Мікалай Маліноўскі (1799-1865). Гэта вядомы гісторык і археограф. Яго жонка Ганна (асыстэнка на хросце) была дачкой знакамітага віленскага фармацэўта Ежы Гутта (1769-1836). Хросная маці - Марыяна-Марыя-Габрыеля Рэфероўска (1810-1846) была жонкай Аляксандра Гутта (брата Ганны Маліноўскай). Асыстэнт Генрык Эмануэль Глюксберг (1802-1870) - вядомы кнігагандлёвец.
![](https://blogger.googleusercontent.com/img/b/R29vZ2xl/AVvXsEiC8MygUXmAxB31UyLdFiuHxEzn6YQkpH4km1_VgNfMxeUW6YmP5T4sAmQ0QEI2ivGaMZ-dUdyJNlFpVK_R0e9vQX0JPMMs9Jz7U9LcPdsxc9ty3qsqELa5quUzASxCN7V-rC6cK-S2efupDcS4dvrvtf7VDWcmXA9MGRNl15dBKiBjezYYUS0_gus/s320/Mika%C5%82aj_Malino%C5%ADski._%D0%9C%D1%96%D0%BA%D0%B0%D0%BB%D0%B0%D0%B9_%D0%9C%D0%B0%D0%BB%D1%96%D0%BD%D0%BE%D1%9E%D1%81%D0%BA%D1%96_(J._Chrucki,_1847).jpg) |
Мікалай Маліноўскі |
Таксама індэксаваны запіс шлюбу бацькоў Казіміра Сайкоўскага. 29 чэрвеня 1836 г. у віленскім касцёле Св. Яна ўступілі ў шлюб дваране Ежы Сайкоўскі (41 год, сын Ежы С. і Ганны Скараход) і Марыяна Шымакувна (23 гады, дачка Казіміра Ш. і Кацярыны Дабравольскай). Сведкі: Аўгустын Клуцэвіч, Тамаш Шчуроўскі, Юстын Нарвойш, Адам Зенкевіч.
Атрымліваецца, Марыяна нарадзілася каля 1813, што блізка да гадоў з надмагільнага помніка (каля 1811).