Дом Саветаў у Ашмянах

У Ашмянах большасць савецкіх адміністрацыйных і культурных будынкаў зроблены па тыповых праектах: РДК, кінатэатр, універмаг і інш. Але ёсць адзін, які вылучаецца з гэтага шэрагу - Дом Саветаў.

Пра яго нават напісалі ў 4 томе Архітэктуры Беларусі:

"Індывідуальнасцю архітэктурнага вобраза вылучаецца будынак Дома Саветаў у Ашмянах (арх. А.Духан, В.Кісель, 1978 г.). Кампазіцыя будуецца на спалучэнні 6-павярховага прамавугольнага ў плане аб’ёму і аб’ёму двухсвятловай канферэнцзалы. Галоўны фасад вырашаны выступаючай рамай з чляненнем вертыкальнымі пілонамі. На першым паверсе вылучаюцца тры ўваходныя нішы." (Ст. 514-515. Архітэктура Беларусі. Нарысы эвалюцыі ва ўсходне-славянскім і еўрапейскім кантэксце. Том 4. Кніга 2. XX - пачатак XXI ст. 2009).

Дарэчы, Абрам Рыгоравіч Духан адзін з самых вядомых архітэктараў Беларусі. Ён з'яўляецца аўтарам або суаўтарам праектаў шматлікіх вядомых будынкаў у Беларусі (галоўным чынам у Мінске):

1. Будынак Глаўпаштамта ў Мінске (арх. А.Духан, У.Кароль, 1949-53 гг.);

2. Цэнтральны тэлеграф у Мінске (арх. У.Кароль, А.Духан, 1962 г.);

3. Галоўны корпус БДУ (М.Бакланаў, А.Духан, 1962 г.) і інш.

Уселюбскі касцёл 3D

Гэты артыкул не зусім па тэме блога. Проста я зрабіў 3D мадэль уселюбскага касцёла і не ведаў дзе яе змясціць. Магчыма каго-небудзь зацікавіць.

Уселюбскі касцёл магчыма самы стары захаваўшыся да нашых дзён каталіцкі храм на тэррыторыі Беларусі.

Дарэчы, архітэктура уселюбскага касцёла магчыма мела агульныя рысы з гатычным храмам, рэшткі якога захаваліся ў Ашмянах.

Мадэль зроблена на падставе схемы з кнігі Габрусь "Саборы помняць усё":

Корчмы Ашмянаў

У блоге ўжо быў артыкул аб адной ашмянскай карчме - "Віленскай".

1) Яшчэ адна з самых вядомых  корчм горада - так званая "напалеонаўская", якая знаходзілася на месцы срыжавання сучасных вуліц Савецкай (раней Жупранская, Пілсудскага) і Піянерскай (Янкоўскага). У архітэктурным плане яна вельмі падобна на "Віленскую". Па адной з легенд, у гэтай карчме ненадоўга спыняўся Напалеон падчас адступлення яго войск, таму яе часам і называюць "напалеонаўская".

Малюнак з кнігі "Гісторыя Беларусі. 3 том, 2007.

Цікава, што гэта карчма была дастаткова папулярнай сярод даваенных фатографаў:

У 1967 г. на месцы карчмы паставілі помнік барацьбітам за савецкую ўладу (на ўшанаванне памяці 40 чалавек, якія загінулі 1939-47 гг.):

Скульптурная кампазіцыя: воін і партызанка

2) У кніге Янкоўскага Powiat Oszmiański, ч.1 узгадваецца старосцінская карчма. Яна знаходзілася на вуглу Рыначнай плошчы, на месцы, дзе пачынаюцца Барунская і Першамайская (Казначэйская) вуліцы. Назва карчмы сведчыць, што доўгі час яна належыла ашмянскім старостам. Потым, як бачна з плана, нейкі час належыла яўрею Гурвічу. У канцы XIX ст. карчма развалілася.

"Nietylko Oszmianie, ale, ba, całemu powiatowi imponowała karczma starościńska osiadła od wiek wieków na tem mniej więcej miejscu, gdzie dziś stoi murowany dom Abelowicza, tj. u rynku samego, opodal nowej cerkwi, wzniesionej na fundamentach byłego Dominikańskiego kościoła. Kiedy lat temu około trzydziestu rozwalać ją przyszło, ledwie radę sobie z tem dano, tak olbrzymiemi były brusy drzewa, tak mocnemi żelaznych sztab związania..."

План 1866 г.

таксама

месца дзе была карчма

3) У кніге Сергачова С.А. "Белорусское народное зодчество" узгадваецца яшчэ адна ашмянская карчма, якая знаходзілася на вул. Камсамольскай (Папярэчнай) д. 5. Яна была пабудавана па прынцыпу вяночнкага двара: шынок і пакоі для пастаяльцаў аддзяляліся ад жылля карчмара, кухні і кладовак скразным праездам са стайняй.

Фота з кнігі Сергачова:

Месцараспалажэнне корчмаў на спадарожнікавым здымку:

1 -"Віленская"; 2 - "Напалеонаўская"; 3 - "Старосцінская"; 4 - карчма на Папярэчнай вуліцы

Вось яшчэ здымак адной невядомай карчмы ў Ашмянах (а магчыма гэта адна з вышэй узгаданых корчмаў):